Mere alfaaz

kuch alfaaz bin kahe asar chod jaate hain

kuch kehkar bhi kuch naa badal paate hai

kahi thi jo baatein wo maine tumse

jaane kuch asar hua tha ke nahi

kabhi lafzon se kabhi ishaaron se kaha

kabhi in nigaahon se samjhaana chaha

kuch tum samjhe kuch ka koi asar na hua

humne socha ki humne tumse kyun hi kaha

kuch baat ab bhi you mere man mein aati hai

bin kahe wo yun hi bas khayalon se guzar jaati hai

ab main keh nahi paata hun kisi se bhi kuch

shayad mere alfaazon ka koi mol nahin.

ek chuppi ke saath thehar gaya hun main

mere saath chalne ko koi humsafar jo nahin.

bas yun hi..kuch socha tha

do chaar kadam tum chale

do chaar kadam hum chale

na tumko pata chala na humko

ye faasle kab badne lage..

Main Aur Meri tanhaai

Rehti hai wo mere saath mein sada.

jaise maano meri parchaai hai..

zindagi bhar saath ka kiya tha usne waada

ab tak wo wafa karti aayi hai.

is bewafa zamane mein sab apno ne jab chod diya.

mere us dost ne mera saath diya.

koi bewafa nikla kisi ne humko ruswa tha kiya

koi to tha jo mere sang fir bhi chala.

kabhi paas kabhi door rehkar

usne har mod pe mera saath diya

uthi jab nigaah kisi ki chah mein

usi ne muskura kar mujhe thaam liya

kabhi dekha na kabhi suna usko maine

har jagah bas use saath mehsus kiya

is bhare jahaaan mein mera sirf dost hai wo

logon ne jise tanhaai ka hai naam diya

(C) Deepanshu Pahuja

Wo mulakat ka zikr

utha jab subah to muskura raha tha

khayal bas mujhe unhi ka aa raha tha

socha aaj unse mulakat ho jayegi

aur kuch nahi to thodi baat ho paayegi

ab us mulakat ka intezaar nahi hota

yun bekaraar na hote agar pyaar na hota

ye dhadkan jo meri ab badne lagi hai

kahin tham na jaaye wo darne lagi hai

bhule hain khudko kya pata kya thikaana

ab kehlo tum aashik ya kehlo deewana

intezaar hai unka bas ke deedar ho jaaye

kuch unki sunein hum kuch apni batayein

kuch hi palon mein ab unse milenge

patjhad mein bhi har su gul wo khilenge

lo ho gayi hai shaam aur wo waqt aa gaya hai

unke suroor ka nasha chaa gaya hai

nikalte hain ab unse na intezaar hoga

dil unka bhi yun hi bekraar hoga

yahi sochkar unse milne nikalte hain

ab waqt hua hai chalo chalte hain..

(C) Deepanshu Pahuja

yaad

aaj mujhe lo fir tumhari yaad aa gayi
beete dino ki wo kahani yaad aa gayi
chod kar jab humein tum chale gaye the
din wo hum yaad kar rahe the.
ek din tera wo yun rooth kar chale jaana
fir tera mud kar wapis na aana
gamgeen teri judai ke wo sab din
hum bhool nahi paaye wo palchin.
xcuse me kehkar vo baatein shuru karna
wo choti si baaton pe mujhse jhagadna
ishaare kar kar ke wo mujhko sataana
jaan meri keh kar mujhko bulana
ladna jhagadna vo ruthna manaana
vo tumhara laton mein yun ungli ghumana
raaton ko tumhari yaadon mein wo shayari likhna
subah tumse milke tumhe wo sunana
naraaz hona wo tera choti choti baaton par
uth kar chale jaana wo mere mazaakon par
main chahkar bhi nahi bhool sakta hun wo sab
teri yaad mein yu main tadpunga kab tak
yaad teri na aaye main dua karta hun
zindagi se main maut ki iltezaa karta hun
puraane wo din yaad aate hai fir bhi
kasak si wo dil mein uthate hain ab bhi
o mere sanam teri yaadon ko arpan
qurbaan karta hun apna saara jeevan

Tum to nahi the

Aaj baitha tha subah

kuch nayi purani yaadein liye

khud se thoda keh liya

baaki sab yunhi guzar gaya

shaam ho chali hai ab

par shayad kuch kehne ko reh gaya.

socha tumse wo keh lun ab

par main kuch bhi keh na saka.

aksar yun hi is zindagi mein

jab bhi kuch kehne ko hua

maine paaya main akela

khud se sab kehta raha

khushiyan bhi thi aur gum bhi the

saath mein tum aur hum bhi the

par wo saath kuch pal ka tha

kab bichde pata na chala

tumne kaha tha mujhse

tum sang chaloge sada

sang tum chale ye jahan chala

par main fir bhi tanha hi tha

socha aisa kyun hua

aisa kyun mehsus kiya

to jaana hai ye maine aaj

ki wahan koi bhi na tha

tumse milta raha fir bhi

tanha sa mehsus kiya

bahut socha to hun samjha

ki aisa kyun laga

wo tumhara aks tha

jo mere saath chala

haan wo tumhara aks hi tha

jo sada mere saath chala.

keh sakta hun main ye ab

Tum to nahi the, kabhi bhi nahi the

(C) Deepanshu Pahuja